كتير مننا ممكن تعدي عليهم تجارب عاطفية فاشلة نتيجة خيانة او غدر او كذب. وتكون الواحدة مننا اتعلقت بالطرف التاني وخلتو يبقى مركز حياتها بمعنى ان كل حياتها بتدور حواليه زي ما الارض بتدور حوالين الشمس. تبتدي تعتاد وجوده في حياتها تدريجيا لحد ما يبقى زي النفس متقدرش تستغنى عنه عشان تعيش. ولان الحب اعمى زي ما بيقول الحكماء فان كل عيوب الشخص التاني بتختفي وممكن تتحول لفضائل وتبقى البنت مش شايف فيه غير ملاك ماشي بين الناس وتديلو كل ثقتها وحبها.
فجاة من غير مقدمات ينقلب الشخص دا الى جلاد مفيش في قلبه شفقة او رحمة. يغرس سكين خيانته بدون ادنى شعور بالذنب في قلب الضحية، من غير ما يفكر لحظة ان الانسانة دي ادته حياتها ومش هتعرف ترجع زي الاول من غيروا.يبتعد بعد عملته دي ويسيبها تواجه مصيرها المجهول وشماتة الناس الي ياما نصحوها تثقل عليه.
تبتدي وقتها اصعب فترة وهي فترة ما بعد الفشل، تكون المعنويات فيها محطمة والدموع مبتخلصش، وتعيش الواحدة فينا ايام وليالي والعذاب محاصرها من كل ناحية وبيصورلها مشاهد الخيانة الي كانت عميانة عنها. يبتدي الالم يسكن قلبها و تسود الدنيا في عينيها وتفقد حبها للحياة. العذاب والالم بيصورولها الحياة من غيره مستحيلة فتتمنى الموت عشان تتخلص من العذاب.. ودا اكبر غلط
النهردة هفتح اجزخانة الحب واوصفلكم الادوية الي ممكن تساعد في الشفاء العاجل باذن الله.هنبتدي بمسكنات للالم وبعدين نزود الجرعة عشان نخلص من الكابوس دا ونقفل الصفحة دي من حياتنا الى الابد. وبتمنى منكم تشاركوني بنصائحكم وخبراتكم وتجاربكم
- اول حاجة تعمليها هي التقرب الى الله اكثر لانه الوحيد الي قادر يخرجك من الي انتي فيه. اجتهدي في العبادة وتوجهيلو بالشكوى وتذللي بين يديه واطلبي منو يجبر كسر قلبك ويلهمك الصبر عشان تقدري تواجهي الصدمة الي انتي فيها.
- ثانيا اوعي تدعي على نفسك بالموت مهما كان المك شديد لان الحياة فرصة لينا للاستزادة من الخير ومحدش ضامن انو هيدخل الجنة باعماله يبقى ليه نضيع فرصة زي دي.وبعدين موتك مش هيحل المشكلة لان الي سببلك الالم مش فارقة معاه ان كنتي عايشة او ميتة لانها لو كانت تفرق مكنشي عمل الي عمله . هو متهني بحياته الجديدة ومش حاسس بمعاناتك. غير كدة اكيد مش هو الشخص الي يستاهل تموتي عشانه وطالما هو الي باعك يبقى هو الخسران.خلي ثقتك بنفسك قوية وحبي نفسك اكتر من حبك ليه
-ثالث حاجة اصبري وحاولي متخليش الصدمة تضعفك او تخليكي تاخدي قرارات متسرعة ممكن تندمي عليها بعدين. وكل اما تلاقي نفسك هتضعفي ومش قادرة تصبري تذكري حديث الرسول صلى الله عليه وسلم :"عجبت لأبن آدم كل أمره خير ان أصابته ضراء صبر فكان خير له وان أصابته سراء شكر فكان خير له" . يبقى دي فرصة عشان تاخدي اجر الصبر. ومين متنازل عن اجر زي دا؟.
-رابعا عيشي حياتك، متقفليش على نفسك باب قوضتك وتبعدي عن الناس لان الوحدة بتزود همومك اكتر، كفاية اوي الي ضاع من عمرك مع واحد ما يستاهلش بلاش تضيعي عليه يوم تاني من عمرك..العمر مش بعزقة نضيعوا على خاين او كداب. احنا محتاجين لكل يوم عايشينه وكل شمس بتشرق علينا هي فرصة جديدة لعمل الخير والتوبة عن الاخطاء.
-خامسا عيطي.. ايوة عيطي لانو لو معيطيش هتتعبي اكثر..العياط بيريح ويساعد اوي.. بس مش اوي يعني..حافظي على جمال عينيكي بردو..خسارة يروحو في حد زي دا..
-سادسا بلاش العبارات المتشاءمة زي "مش ممكن انساه" او "مستحيل اعيش من غيرو" زي ما نسيكي لازم تمحيه من حياتك..اعتبريه مات.. والموتى ما بيرجعوش.. واحنا مش بنحب نعيش مع الاشباح لااننا بنخاااااف منهم..يبقى لازم تستمر حياتك من غيره زي ما هو كمل حياته من غيرك..انتي مش اقل منه
-ساابعا، كرامتك وكبريائك هما دول رأسمالك، خليكي قوية واوعى تتهاوني معاه وافتكري دايما انو هو الي باعك وانك هنتي عليه رغم كل التضحيات الي عملتيها علشانه
- ثامنا ابعدي عنك كل حاجة ممكن تفكرك بيه، اوعي تمشي في الطريق الي بيجي منو، تجنبيه، متروحيش اماكن رحتوها مع بعض..هيبقى صعب في الاول بس احنا اتفقنا انك هتبقي قوية..شوية شوية هتلاقي نفسك اتعودتي..
- تاسعا اشغلي حياتك بنشاطات تانية كتيرة واملي الاوقات الي كنتي مخصصاها ليه ، لوني حياتك من جديد وارسمي لنفسك اهداف و احلام جديدة.
-عاشرا متندميش على طيبتك وحبك لانك مش غلطانة انتي بس اسأتي اختيار الشخص لا غير..يعني الانسان دا كنتي فكراه طيب طلع ما يستاهلش..خلصت الحكاية.. العالم منتهاش..لسة الحياة مستمرة ومفيش حد بيموت من الحب
الروشتة دي تستعمليها كل يوم وفي كل الاوقات وباذن الله هتصحي في يوم تلاقي نفسك مش بتفكري فيه. اكيد الجرح هيسيب اثر بس مع الايام هيختفي.
مستنية مداخلاتكم و مشاركتكم
ومتنسوش الردود لو عجبكم الموضوعc[/color
عدل سابقا من قبل lolla_ana في الجمعة يناير 21, 2011 1:40 am عدل 2 مرات