كلمة معرفش انت بتحب تقولها ولا بتكسف تقولها ولا خايف تقولها
والناس تقول عليك جاهل ومش بيعرف حاجة حد فيكم قبل كدة حد سألة عن
حاجة وأفتى لمجرد انه مكسوف يقول معرفش ولا الناس اللى فى الشارع اللى تسألهم
عن الطريق لمنطقة معينة ويقولولك اى حاجة لمجرد انه مكسوف يقول معرفش
فى الحقيقة احنا بنشوف ان الشعب المصرى موقفه فى الحكاية دى غريب
طيب ياعم ما تقول معرفش وخلاص .
ونبدأ الحكاية
حكاية الناس اللى بتسألهم عن الطريق دول ... فى مرة كنت ماشى فى
الطريق والمهم سألت واحد عن الطريق قالى بص يا كابتن انت تمشى على طول و أول يمين
يقبلك ادخل فيه وانا ماشى قلت طيب اتأكد واسأل واحد تانى راح قالى ياعم انت اية
اللى جابك هنا انت ترجع تانى وتدخل من عند المحل اللى هناك دا رحت فعلا زى ما قال
بس لقيت حاجة غريبة لقيت يافته مكتوب عليها المكان اللى انا عايز اروحه بس وصف
تانى خالص غير اللى هما قالوا عليه , طيب لية يعنى كدة ..بيعملوا كدة لية؟!
هى بصوا حكاية بسيطة ويمكن حصلت مع ناس كتير منكم وبعضكم يقول انها
مش غريبة ,بس دي ممكن تضيع الوقت علي أي حد مرتبط بميعاد مهم أو تسبب لأي انسان
عواقب كتيره ممكن كان يتفاداها. هى فعلا مش غريبة هو المعنى هو اللى غريب " هما
لية بيعملوا كدة "
أحنا حتي بنقول لدا
شكرا ودا شكرا بس الفرق ان دا بنشكره فى اللحظة بتاعت السؤال وبعد كدة ممكن ندعي
عليه , طيب لية !!
حد يقولى تفسير
بصوا احنا مش بنقول ان كل
الناس كدة بس الناس الى كدة ياريت تصلح من نفسها وتتأكد انها لو قالت لأ معرفش
احسن ماتقول اعرف وهى متعرفش
ولا ايه رأيكوا ؟